لا تخدعك ظحكه بالوجه الصبوح..ولا يغروك سلام منلبعد

لا تخدعك ظحكه بالوجه الصبوح

ولا يغروك ابسلام منلبعد

غربه تفرحلك اذا اتشوفك جبير

والك اقرب ناس كاتلها الحسد

احذراليمسح اجتافك من يجيك

واحذر الصحبه الكثر بيها العدد

الناس مو كلمن ظحكلك بيه امان

وذاك من ذاك اليوافيلك وعد

ايصح قريب امرافكك لكن حقود

ويصح بعيد ايصيرلك عون وسند

احذر احجايات من طرف السان

ناعمه وبيها الطعم مثل الشهد

هاي دنيا اتغيرت بيها الوجووووه

والظباع التفت ابجلد الاسد

الحميته منلشمس بثنين اديك

ممكن ايعوفك الوحدك بالبرد

ومو عجيبه اليخونك منك وبيك

ويملي دربك شوك ويشوفك ورد

هاي دنيا وما نفع بيها الكلام

والله يدري اشبيها يتغر بعد

الالي على اجتافك صعد من يسألوه

يبتسم ويكول من جدى وجد

والتعلمه الحجي وكل معنى الاصول

ابظهرك ايذم بيك ويطعنك عمد

والتعلمه ايصيب عدوانه سهام

انت كبل اعداه ايصوبلك اشد

ظاعت الدنيا ظاعت الصحبه وعلى الصحبه السلام

والزمان الراح لا اتصدك يرد

صدك من كال اليبجي امشي وراه

وابد لا تمشي ويه المضحك ابد







للشاعر العراقي

عادل محسن